ایک بیمار عورت کا علاج کیمیکل ڈوز سے کیا جا رہا ہے اور اس کی وجہ سے اس کے ماہواری کے دنوں میں خلل پیدا ہو رہا ہے تو اس کی ماہواری کا حساب کیسے لگایا جاۓ؟

اگر کوئی عورت حیض سے پاک ہونے کے بعد دس دن گزرنے سے پہلے خون دیکھے تو یہ استحاضہ کا خون ہے لیکن اگر دس دن یا اس سے زیادہ گزرنے کے بعد دیکھے تو یہ حیض کا خون ہے بشرطیکہ اس  کا دورانیہ تین دن اور تین راتیں یا اس سے زیادہ ہو اور دس دن سے زیادہ نہ ہو اور  اس عورت کی عادت بھی معلوم نہ ہو، اور اگر تین دن اور تین  راتوں سے کم ہو تو یہ استحاضہ ہو گا اور اگر دس دن سے زیادہ ہوا  تواگر اسے دس سے کم کی عادت معلوم ہو تو اس خون کو اس کی عادت پر لوٹایاجائے گا اور  جتنے دن اس کی عادت ہے اتنے دن حیض ہوگا اور اس سے زیادہ استحاضہ ہ ہو گا اور جتنے دن اس کی عادت سے زیادہ خون آیا ان ایام کی نمازیں قضا کرنااس پر واجب ہو گا ۔ اور اگر اسے معلوم عادت نہ ہو تو حیض کو  اس کی زیادہ  سے زیادہ مدت کی طرف لوٹایا جاۓ گا جو کہ دس دن ہے۔ پس اس کے حیض کی مقدار دس دن ہو گی اور اس سے زیادہ استحاضہ ہو گا اور دس دن گزر جانے کے بعد یہ عورت غسل کرے گی۔

اور اگر یہ خون جاری رہا تو وہ ہر ماہ اپنی عادت کا حساب کرتی رہے اور یہی اس کا حیض ہو گا اور مہینے کے باقی ایام پاکی کے ہوں گے، یہ حکم اس وقت کا ہے جب اسے اپنی عادت اور اپنے دنوں کی تعداد معلوم ہو اور اس کے اول و آخر کا علم ہو۔  اگر اس کی عادت نہ ہو تو اس کی عادت کو حیض کی زیادہ سے زیادہ مدت کی طرف لوٹایا جاۓ گا جو کہ دس دن ہے۔ پس اس کی حیض کی مقدار دس دن  ہوگی اور جو خون اس سے زیادہ ہو وہ استحاضہ ہوگا۔ اور جب ثابت ہو گیا کہ یہ استحاضہ ہے تو ہر وہ چیز جو اس پر حیض کی وجہ سے حرام تھی جیسے نماز، روزہ وغیرہ، حیض کے غسل کرنے کے بعد حلال ہو جاۓ گی۔ یاد رہےکہ یہ اندازہ عبادات کے احکام کے ساتھ خاص ہے جیسے نماز اور روزہ وغیرہ، عدت کے احکام کے ساتھ نہیں۔