Je! Naweza kupata Fatwa kuhusu hukumu ya ushoga (mapenzi ya jinsia moja)!

Kwa jina la Mwenyezi Mungu, sifa njema zote ni za Mwenyezi Mungu, na rehma na amani zimwendee bwana wetu Mtume wa Mwenyezi Mungu, jamaa zake, Maswahaba wake na wanaomfuata. Na baada ya hayo:

Hakika Mwenyezi Mungu ameharamisha ushoga (ushirikiano wa kingono kati ya jinsia moja) kwa uhakika na wazi, kwa sababu unapelekea maovu na madhara makubwa kwa jamii na maadili. Aya tukufu za Qur’ani Tukufu zimeeleza bayana uovu huu, ambapo Mwenyezi Mungu amesema: {Na (wakumbuke) Lut, alipoiambia jamii yake: Je, mnaitenda uchafu ambao hakuna mmoja katika walimwengu aliyewatangulia kuutenda? Hakika ninyi mnawajia wanaume kwa tamaa badala ya wanawake. Bali ninyi ni watu mnaopita mipaka. Na haikuwa jibu la watu wake isipokuwa kusema: Wafukuzeni katika mji wenu. Hakika wao ni watu wanaojitakasa. Basi tukamwokoa yeye na watu wake, isipokuwa mkewe aliyekuwa miongoni mwa waliobaki nyuma. Na tukawanyeshea mvua (ya mawe). Basi angalia jinsi ulivyokuwa mwisho wa wakosaji} [Al-A’raf: 80–84]

Na kama ambavyo Mwenyezi Mungu ameharamisha ushoga baina ya wanaume (liwati), pia ameharamisha usagaji baina ya wanawake (sihaki). Amesema Mwenyezi Mungu: {Na wanawake wanaofanya uchafu miongoni mwenu, washuhudie juu yao mashahidi wanne miongoni mwenu. Wakishuhudia, basi wafungeni majumbani mpaka mauti iwachukue au Mwenyezi Mungu awawekee njia nyingine} [An-Nisaa: 15]

Waislamu wote wamekubaliana juu ya uharamu wa ushoga, na hata watu wa dini nyingine pia wamekubaliana katika hili. Al-Imam Al-Qurtubi ameeleza katika tafsiri yake ya Aya za Surah Al-A’raf kuwa kuna Ijma' (makubaliano ya wanazuoni) juu ya uharamu wa liwati.

Tunamshauri mtu yeyote ambaye anahisi kuwa na mwelekeo au tamaa ya kufanya tendo hili ovu, atafute msaada wa daktari au mshauri wa kisaikolojia ili ajitibu kutokana na maradhi haya ya hatari ambayo ni kinyume na maumbile.

Na Mwenyezi Mungu Mtukufu ni Mjuzi Zaidi