Ni nini hukumu ya kuzifanya Aya za Qur`ani Tukufu au Adhana vilio vya simu ya mkononi?

Kwa jina la Mwenyezi Mungu, sifa njema zote ni za Mwenyezi Mungu, na rehma na amani zimwendee bwana wetu Mtume wa Mwenyezi Mungu, jamaa zake, Maswahaba wake na wanaomfuata. Na baada ya hayo:

Qur`ani Tukufu ni maneno ya Mwenyezi Mungu Mtukufu aliyoyateremsha kwa Mtume wake bora na kiumbe wake wa kipekee, bwana wetu Muhammad S.A.W., Tumeamrishwa kuheshimu na kuitukuza Qur`ani Tukufu na kuichukulia kwa namna ya kipekee tofauti na vitabu vingine.

Hakuna anayeruhusiwa kuigusa Msahafu isipokuwa aliye katika hali ya usafi mkubwa na mdogo, kama alivyosema Mwenyezi Mungu: {Hakika hii ni Qur`ani Tukufu (77), imo katika Kitabu kilichohifadhiwa (78), hawaigusi isipokuwa waliotakasika} [Al-Waqi’ah: 77–79].

Pia haifai kuweka kitabu chochote juu ya Msahafu, kwa kuwa Msahafu unastahiki kuwa juu na hauwekwi chini ya chochote. Ubora wa maneno ya Mwenyezi Mungu dhidi ya maneno mengine ni kama ubora wa Mwenyezi Mungu dhidi ya viumbe vyake.

Kwa sababu hiyo, si jambo linalofaa wala si katika adabu kamili kuiweka Qur`ani Tukufu kama mdundo wa simu ya mkononi, kwa kuwa Qur`ani Tukufu ni takatifu na tukufu kiasi cha kutostahiki kutumiwa kwa matumizi kama hayo yasiyo na heshima.

Mwenyezi Mungu amesema: {Hayo ni miongoni mwa alama za Mwenyezi Mungu; na anayezitukuza basi hiyo ni miongoni mwa uchamungu wa moyo} [Al-Hajj: 32].

Kuweka Aya za Qur`ani Tukufu kama mdundo wa simu ni kuchukulia Qur`ani Tukufu kwa namna ya mchezo au mzaha, jambo ambalo linapunguza heshima ya Qur`ani Tukufu. Qur`ani Tukufu imeteremshwa kwa ajili ya kukumbukwa, kutafakari, na kuabudiwa kwa kuisoma – siyo kwa matumizi ya kawaida yasiyofaa.

Matumizi haya yanaihamisha Qur`ani Tukufu kutoka katika maana yake ya kisharia na kuiweka katika maana ya kidunia ya kumjulisha mtu kuwa simu inaingia. Hali hii humfanya mtu ashughulike na kupokea simu badala ya kutafakari Qur`ani Tukufu, na hata huenda Aya ikakatika kabla haijamalizika au maana ikapotoshwa wakati wa kukatisha mdundo huo.

Vivyo hivyo, adhana pia haifai kuwa mdundo wa simu, kwa kuwa adhana imewekwa kwa ajili ya kutangaza kuingia kwa wakati wa Swala. Kuiweka kama mdundo wa simu kunaweza kuleta mkanganyiko na kumfanya mtu afikiri kuwa muda wa Swala umeingia, pia ni kutumia adhana mahali pasipofaa.

Mbadala unaofaa unaweza kuwa ni anashid (Nyimbo za Kiislamu) au kaswida za kumtukuza Mtume S.A.W., ambazo zinafaa kwa urefu wa mdundo wa simu, ama maneno ya Mwenyezi Mungu, yana utukufu wake maalumu na yanapaswa kutendewa kwa namna inayostahiki heshima hiyo.

Na Mwenyezi Mungu Mtukufu ni Mjuzi Zaidi