Uimamu wa mtoto kwa mtoto mwenzake

Question

Ni ipi hukumu ya Uimamu wa mtoto kwa mtoto mwenzake katika Swala? Na je, inatofautiana ikiwa Swala ni ya faradhi au ya Sunna?

Answer

Uimamu wa mtoto kwa mwenzake katika Swala ni sahihi kisharia, iwe katika faradhi au katika Sunna, hususan iwapo itakuwa na maana ya kuwatia moyo watoto wa kiume kujizoesha nayo, na kuwatamanisha kuifikia daraja yake, kupata thawabu ya jamaa na kuizoea. Pamoja na kulizingatia hilo, ni lazima liandamane na kuwafundisha Swala na hukumu zake, kushikamana na nguzo zake na masharti ya usahihi wake.

Maelezo

Sharia tukufu imewahimiza baba na mama katika malezi bora ya watoto, na kuwalea katika malezi yanayojengeka juu ya maadili mema, na kutekeleza ibada na kufanya mema, na kuwafundisha mambo ya dini yao na kuwazoesha kwayo, na kupanda mbegu za dini katika nafsi zao ili ziwe sehemu ya maisha yao; imepokelewa kutoka kwa Jabir Ibn Samurah (R.A), kutoka kwa Mtume (S.A.W) amesema:

“Baba akimfundisha mwanawe – au mmoja wenu akimfundisha mwanawe – ni bora kwake kuliko kutoa sadaka kila siku nusu pishi.” (Imepokelewa kutoka kwa Imam Ahmad katika Musnad).

Na miongoni mwa mambo muhimu ambayo Sharia tukufu imewaamrisha wazazi kuwafundisha watoto wao ni Swala; Mtume (S.A.W) amesema:

“Mtoto akishajua mkono wake wa kulia na wa kushoto basi muamrishe kuswali.” (Imepokelewa kutoka kwa Al-Tabarani katika Al-Mu‘jam Al-Awsat na Al-Saghir).

Na amesema (S.A.W): “Waamrishe watoto wenu kuswali wakiwa na umri wa miaka saba, na wapigeni kwa ajili yake wakiwa na umri wa miaka kumi, na watenganisheni vitandani.” (Imepokelewa kutoka kwa Abu Dawud katika Sunan yake).

Na miongoni mwa njia za kuwatamanisha watoto katika utekelezaji wa Swala na kuwahimiza kushikamana nayo: kuwafundisha elimu ya uimamu katika Swala na masharti yake, hasa wanapokuwa ni wenye kujali kuhifadhi Qur’ani Tukufu. Na kwa ajili ya maana hii baadhi ya Masahaba walipendezwa kuwatoa watoto wao mbele kuongoza Swala, hususan katika Sunna, kama vile Swala ya Tarawehe na nyinginezo.

Imepokelewa kutoka kwa Mama wa Waumini Aisha (R.A) amesema: “Tulikuwa tukichukua watoto katika kuttab (Vyuo vya Quran) ili watuswalishe katika mwezi wa Ramadhan, nasi tukiwatengenezea qaliyya (Mchuzi ulipikwa kwa nyama na maini ya ngamia) na khushkananj (Mkate uliotengenezwa na unga wa ngano na kukandwa na mafuta ya ufuta)” (Imepokelewa kutoka kwa Al-Bayhaqi katika Al-Sunan Al-Kubra na Fadha’il Al-Awqat).

Imepokelewa kutoka kwa Amr Ibn Salamah (R.A) amesema: Baba yangu alisema: “Nimekujia kutoka kwa Mtume (S.A.W) kwa hakika. Amesema: Swala ikihudhuria basi mmoja wenu aadhini, na awaongoze kuswali yule aliye hifadhi Qur’ani Tukufu kwa wingi zaidi. Wakanitazama, na hapakuwa na yeyote aliyehifadhi Qur’ani kwa wingi kuliko mimi, basi wakanitanguliza kuwa Imamu wao, nikiwa na umri wa miaka sita au saba.” (Imepokelewa na Al-Bukhari katika Sahih yake).

Na katika mapokezi mengine amesema: “Sikuhudhuria mkusanyiko wowote wa Jarm ila mimi ndiye nilikuwa Imamu wao, na niliswalia maiti zao hadi leo hii.” (Imepokelewa kutoka kwa Ahmad na Al-Tayalisi katika Musnad, Abu Dawud na Bayhaqi katika Sunan).

Imepokelewa kutoka kwa Hassan Al-Basri (R.A) amesema:

“Hapana tatizo kijana mdogo kuongoza Swala kabla ya kubaleghe.”

Na Wanazuoni wengi wa Madhehebu ya Imamu Hanafi, Maliki, Shafi na Hanabilah wameona uimamu wa mtoto kwa mwenzake katika Swala za faradhi na Sunna ni sahihi.

Tunapata faida kutokana na yaliyotangulia:

Sharia tukufu imewahimiza baba na mama katika malezi bora ya watoto, kuwafundisha mambo ya dini yao na kuwazoesha nayo, na kupanda mbegu za dini katika nafsi zao ili ziwe sehemu ya maisha yao. Na miongoni mwa njia za kuwatamanisha watoto katika utekelezaji wa Swala na kuwahimiza kushikamana nayo: Kuwafundisha elimu ya uimamu katika Swala na masharti yake, hasa wanapokuwa ni wenye kujali kuhifadhi Qur’ani Tukufu.

Uimamu wa mtoto kwa mtoto mwenzake katika Swala ni sahihi kisharia, iwe katika faradhi au katika Sunna.

Uimamu wa mtoto kwa mtoto mwenzake

Uimamu wa mtoto kwa mtoto mwenzake

Question

Answer

Related Fatwas

Liyopendekezwa zaidi

Wasiliana Nasi

Aina ya Taasisi