سال ٢٠٠٥ ء مندرج استفتاء پر ہم مطلع ہوئے جو سائلہ اور اس کے شوہر اشرف محمد مصطفی دسوقی کے درمیان دستوری طور پر تیسری طلاق واقع ہونے کے بارے میں سوال پر مشتمل ہے اس سلسلے میں کچھ لوگوں نے سائلہ کو یہ باور کرانے کی کوشش کی ہے کہ آخری طلاق واقع نہیں ہوئی ہے کیونکہ اس دوران وہ حالت حیض میں تھی اور اس کی وجہ سے وہ سخت نفسیاتی حالات سے دوچار تھی. تو کیا یہ درست ہے؟

فقہ میں یہ تصریح آچکی ہے کہ واضح لفظوں میں طلاق دیتے ہی عورت پر طلاق واقع ہو جاتی ہے چاہے وہ پاکی کی حالت میں ہو یا حیض کی حالت میں بشرطیکہ طلاق دینے والا طلاق دینے کا اہل ہو کیونکہ طلاق دینے کا مقصد ایک بندھن کو ختم کرنا اور اس سلسلے کے حقوق کو اپنے ذمے سے ہٹانا ہے اسلئے یہ کسی خاص وقت کے ساتھ مقید نہیں ہوتا. چونکہ طلاق کے احکام سے متعلق آیتیں مطلق آئی ہیں ان میں ایسی کوئی قید نہیں رکھی گئی ہے اور نہ ہی ان سے ہٹ کر ایسے دوسرے نصوص ملتے ہیں جن سے ان مطلق نصوص کو مقید کیا جا سکے ، اس بنا پر وقوع طلاق کا قول لازم آتا ہے. اور حیض کے دوران طلاق دینے کی ممانعت در حقیقت بیوی کی عدت کو دراز کرنے جیسے ظالمانہ تصرف کی وجہ سے ہے، اسی لیے تو شوہر گنہگار ہوتا ہے . لیکن یہ تصرف طلاق واقع ہونے میں مانع نہیں ہوتا کیونکہ جب حضرت نبی کریم صلی اللہ علیہ و سلم نے ابن عمر کو حیض کے دوران طلاق دینے سے منع فرمایا تو ابن عمر نے پوچھا: "اے اللہ کے رسول صلی اللہ علیہ و سلم آپ کیا فرماتے ہیں اگر میں اسے تین طلاق دے دوں تو ؟ تو آپ صلی اللہ علیہ و سلم نے جواب دیا: "تب تو تو اپنے پروردگار کا نافرمان بھی ہوگا اور وہ تجھ سے جد ا بھی ہو جائے گی".
اس بنا پر اگر شوہر اپنی بیوی کو حیض کے دوران "انت طالق'' تو مطلقہ ہے کہے'، تو طلاق واقع ہو جا ئے گی اور گذشتہ دو طلاقوں کو ملا کر یہ تیسری ہو جائے گی اور اس کی بیوی اس سے جدا ہو جائے گی ، اور یہ جدائی ''بینونہ کبری'' یعنی بڑی جدائی ہو جائے گی اور اگر بیوی کے ساتھ مباشرت ہو چکی ہو تو پھر وہ اس کےلئے اس وقت تک حلال نہیں ہوگی جب تک کہ اسکا کسی دوسرے مرد سے صحیح نکاح نہ ہو جائے اور اس میں یہ بھی شرط ہے کہ وہ اس کے ساتھ حقیقی مباشرت کرے پھر اس کے بعد یا تو طلاق دے یا مر جائے پھر پہلا والا شوہر اس عورت کی اجازت اور مرضی سے اس کے ساتھ نئے عقد اور مہر سے شادی کر سکتا ہے بشرطیکہ اس کی عدت بھی گذر چکی ہو.
امید ہے کہ مذکورہ بالا بیان سے جواب حاصل کر لیا جائے گا.

و اللہ سبحانہ و تعالی اعلم.