کیا اشعری نقل پر عقل کو ترجیح دیتے ہیں اور قرآن و سنت کو نہیں  مانتے؟

یہ بیان اشاعرہ کے دشمنوں کی طرف سے محض  بہتان ہے  تاکہ انہیں التباس میں ڈال کر ان کی اور ان کے عقیدے کی صورت کو مسخ کر سکیں۔ حقیقت یہ ہے کہ اشاعرہ عقل کو نصوص اور منقول کے فہم کیلئے استعمال کرتے ہیں؛ کیونکہ بعض نصوص وہم پیدا کرنے والی اور غیر قطعی ہوتی ہیں، اس لیے وہ ان وہمی نصوص کو محکم نصوص کی طرف لوٹاتے ہیں، اور متشابہ معانی کو اللہ تعالیٰ کے سپرد کر دیتے ہیں، بعض اوقات وہ مسلکِ تاویل اختیار کرتے ہیں اور عربی زبان کے مقتضیٰ کے مطابق اور نص کے مفہوم اور سیاق وسباق کی دلالت کے مطابق اس کی تاویل کر دیتے ہیں ۔سچ تو یہ ہے کہ اس منہج کے ذریعے سےانہوں نے اسلام کی بہت بڑی خدمت کی ہے، اگر یہ منہج نہ ہوتا تو نصوص سے ظاہری معنی لیا جاتا،  اور اہلِ وہم کو اللہ تعالی کے بارے میں ان نصوص سے تشبیہ اور تجسیم کا وہم ہو جاتا- اللہ تعالی اس سے بہت بلند وبرتر ہے- اشاعرہ کے اس منہج کی مثال یہ ہے کہ وہ آیات جن سے اللہ تعالی کے لئے مخلوق کے وصف جیسے وصف کا وہم پیدا ہوتا ہے انہوں نے ان  آیات کو محکم دلالت والی آیات کی طرف پھیر دیا ہے۔جیسے انہوں نے ہاتھ اور پنڈلی والی آیات کو  اس آیت کی طرف پھیرا ہے﴿لَيْسَ كَمِثْلِهِ شَيْءٌ وَهُوَ السَّمِيعُ الْبَصِيرُ﴾یعنی: "اس کی مثل کوئی چیز نہیں ہے، اور وہ سب کچھ سننے والا، سب کچھ دیکھنے والا ہے" [الشوریٰ: 11]، یعنی جن سے اللہ تعالی اور اس کی مخلوق میں تشبیہ کا وہم پیدا ہوتا ہے انہوں نے ان آیات کو اللہ سبحانہ وتعالی کے اس قول پر محمول کیا ہے جو ثبوت اور دلالت میں محکم ہے۔اور یہاں نقل اور نص کے فہم اور اس کے معانی کے ادراک کیلئے عقل کا استعمال ایسے طریقے سے کیا ہے جو ذہنوں میں مقامِ خالق اور اللہ سبحانہ وتعالی کی تنزیہ کے موافق ہے۔