Mene ne hukuncin fadin Bismillah lokacin cin abinci? Mene ne kuma hukuncin wanda ya manta ya tuna bayan ya fara cin abinci?

Fadin bismillah a lokacin fara cin abinci sunna ne; saboda Hadisin Umar Bn Abu Salma (Allah ya kara yarda da su) ya ce: Na ci abinci tare da Annabi (SallalLahu alaiHi wa alihi wa sallam), sai hannu na ya fara kara-kaina a cikin kwano, sai ya ce: (Ka ambaci sunan Allah, ka kuma ci da hannun dama, ka kuma ci gabanka) [Ibn Majah da wannan ma’anar, da Abu Dawud]

Wanda kuma ya manta a farko, zai fade ta a duk sanda ya tuna, sai ya ce: “BismilLahi Awwalahu wa Ãhirahu”; saboda Hadisin da Nana A’isha Ummul muminina (Allah ya kara yarda da ita) ta ruwaito, cewa Manzon Allah (SallalLahu alaiHi wa alihi wa sallam) ya ce: (Idan wani daga cikinku zai ci abinci ya ambaci sunan Allah, idan kuma ya manta bai ambaci sunan Allah a farko ba, to ya ce: “BismilLahi Awwalahu wa Ãhirahu”) [Abu Dawud].

Allah shi ne masani.