کیا ناخن پالش کے ساتھ وضو کرنا صحیح ہے ؟

 الحمد للہ والصلاۃ والسلام علی رسول اللہ وآلہ وصحبہ ومن والاہ۔ اما بعد: عربی زبان میں وضوء " الوضاءۃ " سے مشتق ہے جس کامعانی حسن اور پاکیزگی کے ہیں۔ اگر وُضوء ضمہ کے ساتھ ہو تو اس کا معنی ہے وضوء کرنا اور اگر وَضوء فتح کے ساتھ ہو تو اس کامعنی ہے وہ پانی جس کے وضو کیا جاتا ہے۔
شریعت میں وضوء سے مراد مخصوص اعضاء کی پانی کے ساتھ طہارت حاصل کرنا ہے۔ اور یہ بالخصوص چار اعضاء ہیں۔ جب وضوء معین اعضا کے ساتھ خاص ہے تو پھر وضوء میں ہر ایسی چیز کو زائل کرنا شرط ہوگا جو پانی کو اعضاء تک پہنچنے میں رکاوٹ ہو تاکہ وضوء کا مقصد حاصل ہوسکے ورنہ وضوء باطل ہوگا۔
امام شرنبلالی حنفی رحمہ اللہ وضوء کی شرائط کے بارے میں فرماتے ہیں: تیسری شرط: ہر اس چیز کو زائل کر دینا جس کا وجود پانی کے جسم تک پہنچنے میں رکاوٹ ہو۔ جیسے چربی اورموم۔ آ پ نے موم اور چربی کی ہی قید لگائی ہے کیونکہ تیل وغیرہ پانی کے جسم تک پہنچنے میں مانع نہیں ہوتا۔ ( )
امام زرقانی رحمہ اللہ وضوء کی شرائط کے بارے میں فرماتے ہیں: اس کے صحیح ہونے کی شرائط میں سے ایک یہ ہے کہ اعضاء پر پانی کے مانع کوئی چیز موجود نہ ہو ۔ ( )
امام بجیرمی شافعی رحمہ اللہ وضوء کی شرائط کے بارے میں فرماتے ہیں: کوئی رکاوٹ نہ پائی جائے۔ جیسے جما ہوا تیل وغیر اور اگر جما ہوا نہ ہو تو وہ پانی کے جسم تک پہنچنے میں مانع نہیں ہوتا اگرچہ پانی اس پر ٹھہرتا نہیں ہے۔ ( )
امام ہیتمی رحمہ اللہ فرماتے ہیں: وضوء کی شرط یہ ہہ کہ جسم پر کوئی ایسی چیز نہ ہو جو پانی کو نقصان کی حد تک متغیر کر دے اور نہ ہی کوئی ایسی رکاوٹ موجود ہو جس کی وجہ سے پانی جسم تک نہ پہنچ سکتا ہو۔ ( )
امام رحیبانی حنبلی رحمہ اللہ فرماتے ہیں: وضوء کی شرط یہ ہے کہ ہر ایسی رکاوٹ زائل کر دی جائے جو پانی کے جلد تک پہنچنے میں مانع ہو۔ ( )
ناخن پالش مائع ہوتا ہے جو ناخن پر جم جاتا ہے اور ایک سخت چھلکا سا بن جاتا ہے۔ جس کی وجہ سے پانی ناخن تک نہیں پہنچ سکتا۔ اور ناخن چاہے ہاتھوں کے ہوں یا پاؤں کے، جسم کا حصہ ہیں جیسے غسل اور وضوء میں دھونے کا حکم دیا گیا ہے۔ اللہ تعالی کا ارشاد گرامی ہے : ''اے ایمان والو ! جب تم نماز کیلئے کھڑے ہونے لگو تو دھو لیا کرو اپنے چہروں کو اور اپنے ہاتھوں کو کوہنیوں تک اور مسح کر لیا کرو اپنے سروں کا اور اپنے پاؤں کو ٹخنوں تک ۔'' ( )
پس اللہ تعالی نے ہاتھوں اور پاؤں کو دھونے کا حکم دیا ہے اور یہ وضوء کے اعضاء میں سے ہیں۔ اور ناخن بھی ہاتھ اور پاؤں کا حصہ ہیں اللہ تعالی نے جن کے دھونے کا حکم دیا ہے۔ کیونکہ امر بالکل "ضمنا " امر بالجزء بھی ہوتا ہے۔ اور جب کسی مانع نے اس جز تک پانی نہیں پہنچنے دیا تو وضوء صحیح نہیں ہو گا۔ جس کی وجہ سے اس پر واجب ہے کہ اس مانع کو ختم کرے اور پھر اس حصے کو دھو لے دوبارہ سے باقی ہاتھ پاؤں دھونا شرط نہیں ہو گا۔ کیونکہ بہت سے اہل علم کے نزدیک '' موالاۃ '' یعنی اعضاءِ وضوء میں عدمِ تفریق سنت ہے فرض نہیں ہے۔ مگر مستحب ہے کہ اگر فاصلہ زیادہ ہو جائے تو دوبارہ مکمل وضوء کر لے۔ اور اسی صورت میں اس کے لئے یہ بھی جائز ہے کہ مکمل وضوء کی بجائے صرف اسی حصے کو دھو لے جن پر ناخن پالش لگی ہوئی تھی۔
اگر نہیں دھوئے گا تو یہ حصہ خشک رہ جائے گا اور وضوء اور نماز دونوں ہی باطل ہوں گے اور ان دونوں کا اعادہ کرنا واجب ہو گا اگر اسی وضوء کے ساتھ نماز ادا کی ہے۔ اور اگر نہیں ادا کی تو پالش کو اتار کر اس جگہ کو دھونا اس پر واجب ہے۔
اگر یہ اعتراض کیا جائے کہ پالش مرھم پٹی کے حکم میں ہے اگر پالش کے اتارنے میں مشقت ہو تو اس پر مسح جائز ہو گا۔ تو اس کا جواب یہ ہے کہ پٹی اور ناخن پالش میں فرق ہے۔ پٹی پر صرف عذر کی وجہ سے مسح کرنا جائز ہے۔ امام ابن ماجہ رحمہ اللہ سیدنا علی بن ابی طالب کرم اللہ وجھہ سے حدیث پاک روایت کی ہے کہ میرا ایک ہاتھ کا جوڑ زخمی ہوا تو نبی اکرم ﷺ سے میں نے اس بارے میں پوچھا آپ ﷺ نے مجھے پٹی پر مسح کرنے کا حکم فرمایا۔
پس پٹی پر مسح کرنے کی رخصت ہے اور رخصت صرف اپنی مقدار کے مطابق ہی ہوتی ہے۔
اس بنا پر ناخنوں کے اوپر سے وضوء کرنے سے وضوء صحیح نہیں ہو گا بلکہ اس پر پالش کو واجب ہے۔ اور پھر دوبارہ وضوء کرنا بھی واجب ہے تاکہ ان علماء کے اختلاف سے بچ سکے جن کے نزدیک وضوء میں ترتیب واجب ہے۔ اور ان علماء کی تقلید کرنا بھی جائز ہے جن کے نزدیک وضوء میں ترتیب فرض نہیں ہے۔ تو پھر صرف اسی جگہ کو دھونا واجب ہو گا جس پالش لگی ہوئی تھی۔
واللہ تعالی اعلم بالصواب ۔