ایک بیمار عورت کا علاج کیمیکل ڈوز سے کیا جا رہا ہے، جس کی وجہ سے اس کے ماہواری کے دن بے قاعدہ ہوگئے ہیں، تو وہ اپنی ماہواری کا حساب کیسے کرے گی؟

اگر عورت آخری حیض سے پاک ہونے کے بعد دس دن گزرنے سے پہلے خون دیکھے تو یہ استحاضہ کا خون ہو گا اور اگر دس دن یا اس سے زیادہ گزر جانے کے بعد خون دیکھے تو یہ حیض کا خون ہو گا بشرطیکہ اس خون کی مدت تین دن اور تین راتیں یا اس سے زیادہ ہو اور دس دن سےتجاوز نہ کرے، اور اس عورت کی معروف عادت بھی نہ ہو، اگر تین دن اور تین راتوں سے کم ہو تو استحاضہ ہو گا۔ اور اگر دس دن سے زیادہ ہو تو پھر اگر اس کی معروف عادت دس دن سے کم تھی تو حیض کو اس کی عادت کی طرف لوٹایا جائے گا اور اس کا حیض اس کی عادت کی مطابق ہی ہوگا، اور اس سے زیادہ خون استحاضہ کا ہوگا، اور بایں صورت اس پر وہ نمازیں پڑھنا واجب ہے جو اپنی عادت سے زیادہ دنوں میں اس نے چھوڑی ہیں۔ اگر اس کی معروف عادت نہیں تھی تو اس کا حیض اکثر مدت کی طرف لوٹایا جائے گا جو کہ دس دن ہے اور اس کا حیض دس دن ہو گا اس سے زیادہ دنوں کا خون استحاضہ شمار ہو گااور وہ دس دن گزر جانے کے بعد غسل کرے گی۔

 اگر اس کا خون مسلسل جاری رہے تو وہ ہر ماہ اپنی عادت کا حساب کرتی رہے گی یہی اس کا حیض ہو گا اور مہینے کے باقی دن طہر یعنی پاکی کے دن ہوں گے جب کہ وہ اپنی عادت اور اپنے دنوں کی تعداد کو جانتی ہو اور ان کی ابتدا اور انتہا کو جانتی ہو۔ اور اگر اس عورت کی عادت نہیں تھی تو اس کا حیض اکثر مدت کی طرف لوٹایا جائے گا جو کہ دس دن ہے، لہٰذا اس کا حیض دس دن ہو گا اور اس سے زیادہ استحاضہ ہو گا۔ اور  جب یہ ثابت ہو چکا ہے کہ یہ استحاضہ کا خون ہے تو حیض کا غسل کر لینے کے بعد اس عورت کے لیے ہر وہ کام کرنا جائز ہو جاتا ہے جو حیض کی وجہ سے اس پر حرام تھا، جیسے نماز اور روزہ وغیرہ، یاد رہے کہ حکم کا یہ اندازہ نماز اور روزے وغیرہ جیسی عبادات  کے ساتھ خاص ہے، عدت کے احکام اس میں شامل نہیں۔