نماز میں سورۃ فاتحہ سے پہلے بلند آواز سے بسم اللہ پڑھنے کا کیا حکم ہے؟

نماز میں سورۃ فاتحہ کے شروع میں بلند آواز سے بسم اللہ پڑھنا ان مسائل میں سے ہے جن میں علماء کا اختلاف ہے۔ شافعی فقہاء کرام اور علماء ِ عظام کی جماعت کا مذہب یہ ہے کہ اسے بالجہر پڑھنا مستحب ہے جبکہ دوسرے علماءِ کرام کا خیال ہے کہ اسے آہستہ پڑھنا افضل ہے۔

یہ امر نماز کی ان ہیئتوں میں سے ہے جو سنتِ مؤکدہ کے درجے تک نہیں پہنچتیں؛ ان میں اختلاف سے زیادہ فرق نہیں پڑتا بلکہ معاملے میں وسعت ہوتی ہے۔ جو بسم اللہ کو بلند آواز سے پڑھتا ہے وہ اچھا  عمل ہے اور جو آہستگی سے پڑھتا ہے وہ بھی نیک عمل ہے اور ہر امام کو چاہیے کہ فقہی انتخاب میں لوگوں کو جن مسائل کی عادت ہو اور جن سے وہ مالوف ہوں ان میں جان بوجھ کر ان سے اختلاف نہ کرے ۔

ایسے متنازعہ مسائل کو مسلمانوں کے درمیان نزاع، فتنہ اور تفرقہ کا باعث بنانا جائز نہیں ہے، بلکہ ہمیں چاہیے کہ اختلاف کے وہ آداب اپنائیں جو ہمارے اسلاف اپنے فقہی اختلافات میں اختیار کیا کرتے تھے۔